İran rejimi milli hərəkatçılara dəhşətli işgəncələr verir
   
   Güney Azərbaycanda fars rejimi tərəfindən milli hərəkatçılara qarşı təqiblər bu həftə də davam edib. Bu barədə "Alma"ya Güney Azərbaycan Milli Oyanış Hərəkatı Bakı bürosunun (GAMOH) sədri Ağrı Qaradağlı məlumat verib: "Ötən həftə milli hərəkatçı Əli Miradiyə bir il həbs cəzası kəsilib. O, fevralın 21-də həbs olunmuşdu. İndiyə kimi də qeyri-qanuni olaraq həbsdə saxlanılırdı. Bu yaxınlarda qanunsuz məhkəmə qurularaq, ona həbs cəzası verilib.
   Şəhid Cəlil Abidinin atasına Ettelaat tərəfindən edilən təzyiqlər səngimir. Cəlil 2006-cı ilin may hadisələri zamanı şəhid olmuşdu. Onu Ettelaatın zabiti hamının gözü qarşısında nümayişkaranə şəkildə güllələmişdi. İndi Cəlilin atasından tələb edirlər ki, həmin zabitə qarşı şikayətini geri götürsün. Əks təqdirdə onu sürgün edəcəkləri ilə hədələyirlər. Cəlili güllələyən zabitsə hələ də azadlıqdadır. May hadisələrinin il dönümü qeyd edilərkən həbs olunan 16 yaşlı milli hərəkatçı isə Məhəmmədrza 50 gün qanunsuz həbsdə saxlandıqdan sonra nəhayət azadlığa buraxılıb".
   A.Qaradağlıdan onu da öyrəndik ki, İran rejimi azərbaycanlıların hüquqlarını müdafiə edən mətbuat orqanlarına qarşı da zorakı davranışından əl çəkmir: "Bu həftə daha bir qəzetin- "Heydər baba"nın nəşri dayandırıldı. Həmin mətbu orqanda siyasi şeirlər, milli mentalitetimizlə bağlı yazılar dərc olunurdu".
   GAMOH-un Bakı bürosunun sədri əmindir ki, İran hakimiyyəti azərbaycanlılara qarşı nə qədər sərt münasibət göstərsə də, haqları uğrunda mübarizəyə qalxanlar geri çəkilməyəcək.
   Aynur