«Cavid Hüseynov, Abramidze, Alekseyev və Voskoboynikovu heyətimizə qatdıq, amma...»
   
   «Türkiyənin Antalya şəhərindəki təlim-məşq toplanışımız məhsuldar alındı. Düzdür, hərdən qarlı hava şəraiti daha yaxşı hazırlaşmağımıza maneçilik törətdi. Amma hər halda çalışdıq ki, mövsümün ikinci hissəsinə maksimum hazır olaq. Keçirdiyimiz yoldaşlıq görüşlərində futbolçularımızın göstərdiyi oyundan da razı qaldım». Bu sözləri «Neftçi»nin baş məşqçisi Vaqif Sadıqov deyib.
   Sadıqov komandasının yeni transferlərini dəyərləndirib: «Qış transfer dövründə yarımmüdafiəçi Cavid Hüseynovla yanaşı, müdafiəçi Valeri Abramidze, eləcə də iki hücumçu - Sergey Alekseyev və Vladimir Voskoboynikovu heyətimizə qatdıq. Əlbəttə, bundan da artıq transferlər etmək olardı. Amma bizə təklif olunanlar arasında daha yaxşı tanıdığımız üçün bu 3 futbolçu ilə anlaşdıq. Burada onların 20 günədək bizim nəzarətimizdə olmaları və yoxlama matçlarında özlərini yaxşı tərəfdən göstərmələri də öz sözünü dedi. «Neftçi» daha səviyyəli futbolçular transfer edə bilərdi. Amma gərək qabaqcadan səviyyəli oyunçuların axtarışına çıxasan. Bizdə isə vaxt az idi. Hazırda mövsümün ikinci yarısında uğurlu çıxış haqda düşünürük. Yay fasiləsində heyətimizi daha fərqli oyunçularla gücləndirəcəyik».
   Baş məşqçi komandasının qarşıdakı turlardakı oyunları ilə bağlı da danışıb: «Neftçi» üçün rahat oyun yoxdur. Startdan çox şey asılı olacaq. Fevralın 3-də “Qarabağ”la qarşılaşacağıq. Güclü rəqibdir. Qış transfer dövründə Hollandiyanın “Tvente” klubuna keçən Vaqif Cavadovu Georgi Adamiya əvəzləyəcək. Həmkarım Qurban Qurbanov hələ “Neftçi”yə rəhbərlik etdiyi vaxtdan Adamiyanı tanıyır. “Qarabağ” böyük transferlərə ehtiyacı olmayan və hamımız üçün ciddi rəqibdir. Amma bizim geriyə yolumuz yoxdur. “İlk 6-lıq”dakı yerimizi qoruyaraq, yüksək yerlər uğrunda mübarizəmizi davam etdirməliyik».