«Bakı» Keniya yığmasının üzvünü transfer edir
   
   "Bakı"nın düşərgəsinə daha bir futbolçu gəlib. Bu 1985-ci ildə anadan olmuş Allan Vanqadır.
   Karyerasına vətənində «Lolve» klubunda başlayan Alan 2007-ci ildə «Tusker» (Keniya) klubunda 23 oyun keçirib vg 21 qol vuraraq, ölkə çempionu olub. 2008-ci ildə Anqolanın «Petro Atletiko» klubuna transfer edilib. Son 2 ili Anqola çempionatında keçirmiş ön xətt oyunçusu meydana çıxdığı 35 oyunda 9 qol vurub və ölkə kubokunu qazanıb.
   Boyu 1,86 metr olan futbolçu yığma komandanın çalışdırıcılarının diqqətindən də yayınmayıb. Allanın Keniya millisinin heyətindəki çıxışını da uğurlu saymaq olar. Belə ki, o əsas komandanın heyətində keçirdiyi 21 oyunda 6 dəfə fərqlənib.
   Vanqa "Bakı"nın dünən Biləcəri qəsəbəsindəki Təlim-Tədris Mərkəzində keçirilən məşqinə qatılıb. Onunla bağlı baş məşqçi Bülent Korkmaz qərar verəcək.
   Maraq üçün qeyd edək ki, 2009-cu ilin iyun ayında Ermənistanın "Pünik" klubu Allanı transfer etmək istəyib. Amma açıqlanmayan səbəbdən bu transfer baş tutmayıb.